Dunor iti tengnged ti sinagaba ti maysa a lalaki a biktima iti pammagkong idiay Zone 5, Bantay, Ilocos Sur.
Nabigbig ti biktima a ni Joseph Tabilas Pizarro, agtawen iti tallopulo ket walo, JTC driver, taga-Barangay Banaoang, Bantay.
Ti met suspek ket ni Mark Jefferson Mata Ayco, agtawen iti tallopulo ket maysa, construction worker ti JTC, taga-Barangay Tamurong Primero, Candon City.
Agin-inom ti biktima ken suspek iti in-house barracks dagiti JTC employee idin ta adda saanda a nagkinnaawatan, ket sinibwagan ti biktima iti danum ti suspek.
Gapu iti dayta, binagkong ti suspek ti biktima ket nagsagaba iti dunor iti tengngedna isu a naipaagas iti ospital para iti pannakatamingna.
Ti met suspek a nakemmeg babaen kadagiti nagresponde a pannakabagi ti linteg ket nagsagaba met iti dunor iti ramay ken dadduma pay a paset iti bagina a naipaagas met laeng iti ospital.
Saan pay a narekobre ti patadem a nausar.
