VIGAN CITY – Naipaagas iti ospital ni John Anthony Acena Ranchez, agtawen iti tallopulo ket dua, job order iti LGU-Sta Catalina gapu ti pannakabagkong kenkuana ti kayongna a ni John Florendo Gonzales, agtawen iti tallopulo ket siam, aglaklako iti chicken joy.
Ti suspek ken ti biktima ket agpada a taga-Barangay Pangada, Santa Catalina.
Nagprobokar ti biktima iti sangawanan ti pagtaengan ti suspek ken kinaritna ti suspek a nakaiggem iti kutsilyo ta agtadtadtad iti manok idin ta simrek iti uneg ket ginuyodna ti suspek nga impan iti ruar.
Gapu dayta, nagginnubal ti suspek ken ti biktima ket mapapati a saan a nakontrol ti iggemna a chopping knife wenno kutsilyo ket napuntaan ti tengnged ti biktima.
Narekobre met dagiti pannakabagi ti linteg ti patadem a nausar nga agrukod iti sangapulo ket uppat a pulgada karaman ti apputanna.
Kabayatanna, nakemmeg met ti suspek ken nakakusodian iti Sta. Catalina Police Station tapno dumalan iti husto a proseso.
