VIGAN CITY – Balligi ti pannakatiliw dagiti kameng ti San Ildefonso Police Station idiay Barangay Sto. Niño, Nueva Era, Ilocos Norte ken ni Rowell Seguritan, agtawen iti tallopulo ket walo, tubo iti Barangay Catucdaan, Cabugao, sumangsango iti kaso a qualified theft.
Iti pannaki-uman ti Bombo Radyo Vigan ken ni Police Captain Alberto Ramos Jr., nasurok kumurang dua gasut a ribo a pisos ti naitaray ti suspek manipud iti maysa a kompania idiay Barangay Bajet, San Ildefonso ta daytoy ket maysa nga ahente nga agideldeliver kadagiti nadumaduma nga store.
Kalpasanna, ag-absence without leave (AWOL) ti suspek isu a nagipila met iti kaso ti kompania a tinakawanna.
Sipud dayta, nairuar ti warrant of arrest na babaen iti Presiding Judge iti RTC Branch 20, Vigan City ket nailatang ti PHP24K a pyansa para ti temporaryo a pannaka-wayawayana.
Babaen met ti panagturong dagiti pannakabagi ti linteg idiay Barangay Catucdaan, Cabugao ket adda met dagiti nakaibaga a ti suspek ket aglemlemmeng idiay Nueva Era nga isu met ti inda tinutunton ket balligi a natiliwda.
Nupay kasta, naituding nga iti daytoy met laeng nga aldaw ti panagpyansa ti suspek.
