VIGAN CITY – Dead on arrival ti maysa a lalaki nga agtawen iti duapulo, taga-San Manuel, Pangasinan gapu iti panagtapuakna idiay Pinsal falls, ili ti Sta. Maria.
Iti pannaki-uman ti Bombo Radyo Vigan ken ni Barangay Captain Emeterio Dasalla Jr., immatendar ti birthday party ti biktima ken dagiti kakaduana ket iti mumalem, napagdesisyonanda dagiti kakaduana nga agiinom ket nagdidigosdan iti dayta a gundaway.
Talloda a nagplano a tumpuak ngem dua laeng kadakuada ti nagtuloy.
Idi maipakaammo kenkuana ti pasamak, dagus ti panagturongda iti lugar ket imbilinna kadagiti tanod nga agrikos iti timpuwakan ti biktima.
Nasurok maysa oras ti panangsapsapulda iti biktima ket alas otso uno iti rabii idi makitada ti bangkay iti uneg ta saan daytoy a timpaw.
Natukkol ti akin-kannawan a saka ken akin-kannigid nga imana nga isu puon ti nakatayanna.
Nagpalagip ni Emeterio kadagiti agplamplano a sumrek iti Pinsal Falls a maiparit ti nabartek wenno nakainom ta isu ti masansan a rason ti disgrasya.
