VIGAN CITY – Kaso a panaglabsing iti Republic Act 9165 wenno Comprehensive Dangerous Drugs Act of 2002 ti sangwen ti maysa a lalaki a natiliw iti search warrant operation.
Nabigbig ti suspek a ni Gervi Garcia Sesuca, agtawen iti tallopulo ket innem a taga-Brgy. Salomague, Cabugao, miembro iti Sesuca Oliver Criminal Group, High Value Individual Regional Target iti Oplan Palos ken Top 8 iti Regional Priority Target ti PDEA.
Segun ken ni P/Maj. Franco Catalan, hepe ti Cabugao Municipal Police Station, dati pay a miembro ti suspek iti Arthur Oliver Drug Group ken saan laeng nga iti ili ti Cabugao ti pakamonmonitoranna no di ket kadagiti pay kabangibang nga ili ken isu ti itudtudo dagiti kakaduana nga immunan a natiliw a supplier da iti droga.
Naala iti pagtaengan ti suspek ti dua a piraso ti medium heat sealed transparent plastic sachet ti shabu, lima a piraso ti heat seales transparent plastic sachet nga ikotna nga agdagsen iti nasurok kumurang 15 grams nga aggatad iti PHP120K.
Malaksid ti dayta, naala pay ti maysa a piraso ti tin can ti kendi, improvised glass tube, maysa a piraso ti maatap a shabu residue ken uppat a piraso ti plastic sachet nga awan ti kargana.
Nakakustodian ti suspek pakairamanan dagiti naala kenkuana a kontrabando iti Cabugao Municipal Police Station tapno dumalan iti husto a proseso.
