VIGAN CITY – Nagpakamatay ni Reymundo Daoa Balbas, agtawen iti limapulo ket innem a taga-Brgy. Caparia-an, Sta. Cruz gapu ti mapapati a saanna a maawat ti panangpanaw ti siam a tawen a live-in partner na kenkuana.
Iti pannaki-uman ti Bombo Radyo Vigan ken ni P/Capt. Roger Baling-oay, mapapati a mal-maltratwen ni Balbas ti live-in partner na na isu a napan dagiti pannakabagi ti linteg idi nakaawatda iti tawag manipud ti kabagyan ti live-in partner ti biktima nga agpatpatulong ket napagtutulaganda nga agawiden idiay Cabugao ti live-in partner-na.
Impagarup dagiti pannakabagi ti linteg a naurnosen ti tulagan ta nagpinnakawanen dagiti aglive-in partner isu nga inlugandan ti babai nga agawid koman idiay Cabugao ket nakangegda iti putok ti paltog.
Idi sinublida ti lugar ket nasarakan iti kuartona ti biktima a nagpakamatay babaen ti Taurus Caliber 40 nga imputokna iti ngiwatna idinto nga adda pay ti caliber 38 revolver a nasarakan iti nakalukat a plastic cabinet-da.
Iti pakpakauna nga imbestigasyon dagiti pannakabagi ti linteg, pagat-atapan ti biktima ti live-in partner na nga adda sabali a lalakina.
Agtultuloy ti panangimbestigar dagiti pannakabagi ti linteg inaig ti pasamak.
