Nakemmeg ti maysa a lalaki a nangipaturong iti peke a paltog iti kabsatna iti Barangay Puerta Real, Sto Domingo, Ilocos Sur.
Nabigbig ti suspek a ni Richard Tulbera Andres, agtawen iti tallopulo idinto a ti biktima ket ni Jennifer Tulbera Andres, agtawen iti duapulo ket pito, agpada nga agnaed iti nasao a lugar.
Agkabbalay ti suspek ken biktima ket idi nakasangpet ti suspek iti pagtaenganda, nabartek ken agbirbiruk iti makan.
Rimsua ti saanda a nagkinnaawatan ket nagprobokar ti suspek ket dinadaelna ti aruangan ket pader ti kuarto ti biktima.
Sinerrek ti suspek ti kuarto ti biktima ket pinaturonganna ti bassit a peke a paltog.
Gapu dayta, nagpaarayat ti biktima ket napan met naganawa ti ulitegda a ni Jesus Soliven.
Dagus a nagresponde dagiti pannakabagi ti linteg iti lugar ket insuko ti suspek ti dua a pistol gun replica nga impaturongna a pinangbutbuteng iti kabsatna.
