VIGAN CITY – Dead on arrival ti maysa a lalaki idiay Barangay Nanguneg East, Narvacan gapu ti pannakatnagna manipud iti maikadua a kadsaaran iti maipatpatakder a pagtaengan.
Nabigbig ti biktima a ni Jemar Tolentino, agtawen iti tallopulo ket maysa a taga-Barangay Lubong Laud, Sta. Maria.
Iti pakauna nga imbestigasyon dagiti pannakabagi ti linteg, agin-inom ti biktima ken ti gayyemna a ni Jaime Sison Jr., agtawen iti tallopulo ket maysa a taga-Barangay Lubong, Laud iti terrace ti maipatpatakder a balay ni Marlyn Ciubal idiay Barangay Nanguneg East, Narvacan idin ta timmakder ti biktima a mapan koma umisbo.
Bayat ti panagbabana, aksidente a natnag iti baba manipud iti maikadua a kadsaaran ti pasdek nga ayanna a gapuanan ti pannakadunor ken pannakaipaagasna iti Ilocos Sur District Hospital, Narvacan para ti pannakatamingna ngem saanen a nakalasat.
