VIGAN CITY – Nakapyansan iti gatad a tallo ribo a pisos ni Arnel Jacob, agtawen iti tallopulo ket siam a tubo ti Barbar, San Juan ngem agnaed ita iti Brgy. Capangdanan, Bantay gapu ti panagprobokarna idi May15.
Iti pannaki-uman ti Bombo Radyo Vigan ken ni PMaj. Juan Jhayr Maggay, nakainom ti suspek idi pinagsawsaw-anna dagiti barangay official ken panangpangtana kadagiti nagresponde a kapulisan.
Natiketan pay ti suspek gapu ti panaglabsingna iti quarantine protocols ken curfew hour ta adda koma papananna iti kabangibang a barangay ngem nupay kasta, nagkidkiddaw ti pammakawan gapu ti inaramidna.
Malaksid ti dayta, natakuatan a ti suspek ket datin nga adda rekordna kadagiti pannakabagi ti linteg agsipud ta naibalud idi 2016 gapu ti iligal a droga.
