VIGAN CITY – Nakemmeg ti maysa a lalaki a sumangsango ti kaso nga Acts of Lasciviousness idiay Brgy. Pudoc, San Vicente.
Nabigbig ti akusado a ni Gines Rod Jeric Batilong Galan agtawen ti dua pulo ket maysa tubo ti Brgy. Montana, Baclayon, Bohol ngem temporaryo nga agnanaed ti nasao a barangay.
Basar ti report manipod ti San Vicente Police Station, napannangala ti police clearance ni Galan nga agapply kuma ti trabaho ngem rimmuar nga adda gayam iti warrant of arrest kontra kenkuana inaig ti nasao a kaso.
Innayon ti PNP a saan nga ammu ti akusado a nagtuloy a naipila ti kaso kontra kenkuana ken iti agdama maisagsaganan iti panangipaimada kenkuana idiay Taguig City Police Station.
Nailatang ti sangagasut walo ribo a pisos a piyansa ni Galan para iti temporaryo a pannakawayawayana.
