VIGAN CITY – Dead on arrival ni Omar Abdul Sawey, agtawen iti duapulo ket innem ta napaltugan ni Aris Ladiong Yang-I, agtawen iti sangapulo ket siam, agpada nga agnaed iti Barangay Aluling, Cervantes.
Nakaawat ti Cervantes Police Station iti tawag manipud iti Bessang Pass Memorial Hospital a mangipakpakaammo nga adda ti biktima iti pammaltog a naitaray iti nasao nga ospital.
Nagresponde dagiti pannakabagi ti linteg ket idi makadanunda iti ospital, boluntaryo a simmuko ti suspek ken inaminna ti pannakapaltogna iti biktima.
Insuko ti suspek ti paltog a caliber 45 pistol a nausar nga adda maysa a mag ken tallo a balana.
Iti pakpakauna a duktal, sakbay ti pasamak, napan naturog ti biktima kalpasan ti panaginomda ti suspek ken ti maysa pay a managan iti Dante Lacwayan idin ta bayat ti panangkita ti suspek iti paltog iti uneg ti slingbagna ket nakalbitna ti paltog a nakapuntaan ti akin -igid a paset ti barukong ti biktima.
Iti agdama, nakakustodian ti suspek iti Cervantes Police Station tapno dumalan iti husto a proseso.
