VIGAN CITY – Agtaltalinaed iti intensive care unit ni Reynaldo Cabrales Ragadi, agtawen iti tallopulo ket walo, agnaed iti Barangay Ora Centro, Bantay gapu ti pannakapaltogna.
Iti pakpakauna a duktal dagiti pannakabagi ti linteg, bimmisita ti biktima iti natayan idiay Ora East iti nasao nga ili idin ta idi agawid ket nagkakalubbonda iti motorsiklo kaduana da Benjie Bautista Petate, agtawen iti duapulo ket siam, ken ni Jericho Palacpac Pantaleon, agtawen iti sangapulo ket walo nga agnaed iti nasao a lugar idin ta adda dagiti suspek a nakalugan iti motorsiklo a nakasuot iti helment ken nangisit a jacket a sumarsaruno kadakuada ket pinaputukanda ti biktima iti namintallo a daras a nakatirwan iti panga ken akin-kannawan nga abagana.
Dagus a naglibas dagiti suspek kalpasan ti pasamak idinto a ti maatap a nausar ket calibre 45.
Nupay kasta, agtultuloy ti panangsapul dagiti pannakabagi ti linteg ken ti panangimbestigar no ania ti motibo iti pasamak.
