VIGAN CITY – Saanen a kasoan ni Estrelita Valdez nga agtawen ti uppat a pulo ket dua ti asawa na a ni Alexander Valdez nga agtawen ti uppat a pulo ket lima a nanguram iti pagtaengan da idi alas onse singko iti rabii idi November 17 idiay Sitio Kimmansir, Barangay Barbar, San Juan, ngem nu makaruwar iti pagbaludan ni Alexander ket saan dan nga agdenna pay.
Nadakamat ni Estrelita a nakaro nga imon iti mapapati a rason nu apay nga inuram ni lakay na iti pagtaengan na ngem inkalintegan na iti bagi na ta awan iti dakes nga aramid na a mabalin kuma a pagimunan iti lakay na.
Iniystorya na pay a nabiit pay laeng a nagsubli idiay balay da ta iti kallabes ket kinamat-kamat ti lakay na iti buneng gapu met laeng iti nakaro nga imon na ta atapen na a ti panagap-apply na idiay ballasiw taaw ket isu iti gundaway nga agsarsarak da iti lalaki na ngem saan met a pudno.
Mapatta-patta nga innem a pulo ribo a pisos iti gatad dagiti nadadael a sanikua ken alikamen da Valdez ket awan pulos iti naisalbar da uray maysa laeng a paris a bado wennu alikamen dagiti lima nga annak da.
