Lalaki a nangtagbat iti kabsatna, nakemmeg

Nakemmeg ti maysa a lalaki a nangtagbat iti kabsatna idiay Barangay San Vicente, Magsingal, Ilocos Sur.

Nabigbig ti suspek a ni Denver Diego Menor Tolentino, agtawen iti sangapulo ket walo idinto a ti biktima ket ni Hans Christian Menor Tolentino, agtawen iti duapulo ket maysa, agpada nga agnaed iti nasao a lugar.

Maibasar iti imbestigasyon, nagriri ti suspek ken biktima ta idi agsagsagana ti suspek iti pangrabiina, dinanog ti biktima a kabsatna ti ulona, isu a tinagbat met ti suspek.

Naipaagas iti ospital ti biktima babaen iti ina ken ti kabsatna a suspek.

Narekobre ti kutsilyo nga agrukod iti 13 a pulgada pakairamanan ti aputanna.