Napilaanen iti kaso ti lalaki a nangprobokar iti gwardya idiay Barangay Bayubay Sur, San Vicente, Ilocos Sur.
Ti suspek ket agtawen iti tallopulo ket pito, taga-Barangay Bayubay Sur, San Vicente.
Iti pannaki-uman ti Bombo Radyo Vigan ken ni Police Captain Pedro Halover, adda saan a naited sueldo ti suspek iti pagub-ubraanna a warehouse ket nabagaan nga agsublinto nga umay mangala inton Lunes.
Ngem idi nakainom ket napan prinobokar ti suspek gwardya ken adda pay iggemna a patadem isu a nagresponde dagiti pannakabagi ti linteg a puon ti pannakakemmegna.
Segun met kadagiti tanod iti barangay, pasaray ti panaglaaw-laaw ti suspek tunggal makainom.
Ti suspek ket datin nga adda kasona ken nabalud iti sangapulo ket uppat a tawen.
Kabayatanna, ti kutsilyo nga agrukod iti 12 a pulgada nga ikot ti suspek ket nakakustodian kadagiti pannakabagi ti linteg.
