VIGAN CITY – Nakemmeg babaen iti hot pursuit operation ti maysa a lalaki gapu iti panangdangranna iti ulitegna idiay Sitio Turod, Barangay Pagsanaan Norte, Magsingal, Ilocos Sur.
Nabigbig ti suspek a ni Rheyjohn Almajano Ramos, agtawen iti duapulo ket innem, construction worker idinto a ni Froilan Urganay Almajano, agtawen iti uppat a pulo ket maysa, agpada a taga-Barangay Pagsanaan Norte, Magsingal.
Iti pannaki-uman ti Bombo Radyo Vigan ken ni Police Captain Rodel Ragasa, agiinom ti biktima ken suspek ken dagiti dadduma pay a kabagyanda idin ta ti biktima ket pinagsawsaw-anna dagiti kabagyanna.
Simrek iti pagtaenganda ti biktima a nangala iti kumpay ket nagkariar.
Inanawa daytoy ti suspek ngem isu ti insublat ti biktima a kinariar isu a nangala ti suspek iti tubo ket inmalona iti rupa ti biktima.
Gapu iti dayta, nadunor ti rupa ti biktima a naipaagas iti ospital para iti naan-anay a pannakatamingna.
Nakemmeg ti suspek ken nakumpiskar ti landok a 2 feet and 4 inches ti kaakabana a dagitoy ket nakakustodian iti Magsingal Police Station para iti proper disposition.
Saan metten nga agipila ti biktima iti kaso kontra iti suspek.
