VIGAN CITY – Dead on arrival ti maysa a mannalon ta nadungpar ti SUV kabayatan ti panagballasiwna idiay Brgy. San Ramon, Magsingal.
Nabigbig ti biktima a ni Iluminado Duque Ulangco Sr agtawen lima pulo ket tallo, mannalon ken agnaed ti Brgy. Bacar, Magsingal ken ti driver ti Mitsubishi Montero a ni Edward Simpliciano Balisacan agtawen uppat a pulo ket maysa agnaed ti Brgy. 6, San Nicolas, Ilocos Norte.
Basar ti imbestigasyon ti Magsingal Municipal Police Station, kinibin ni Ulangco ti bisikletana a bumallasiw ket dimteng ti napaspas nga SUV nga agpapaamyanan a direksyon ket nadungparna ti biktima a naipurwak.
Nagsagaba iti nakaro a dunor iti pannakadungparna ni Ulangco a naitaray a dagus iti ospital ngem daksanggasat ta naideklara a dead on arrival.
