VIGAN CITY – Maysa a lalaki iti mapilaan ti kaso a Qualified Theft gapu iti panangitarayna ti kuarta a nagsingiranna iti softdrinks idiay Brgy. Luna, Burgos.
Nabigbig ti biktima nga agtawen iti duapulo ket walo nga agnaed iti nasao a lugar idinto a ti suspek ket lalaki a tubo iti Piat, Cagayan nga agdama nga agnanaed idiay Sitio, Bagong Barrio, Brgy. Poblacion Sur, Sta. Maria.
Iti pannaki-uman ti Bombo Radyo Vigan ken ni PLt. Donaldson Pagalanan nga OIC iti Burgos Municipal Police Station, idi pay laeng July 9 idi saanen a nagsubli ti suspek manipod nasingirda dagiti deldeliveranda iti softdrinks idiay Sta. Maria ken Narvacan.
Segun ken ni Pagalanan, apaman a nasingirda iti bayad nga umabot iti P94,244 ket nagpambar nga agsakit ti tiyan ti suspek isu nga imbatina ti driver ken pahinante nga isu iti nagsubli iti ili ti Burgos ket nagkarina a sumarunonto ngem awanen iti naurayda.
Nupay nakaaramid iti maikaniwas ti suspek ket inikkan isuna ti gundaway ti biktima tapno ikarona laengen ti nagbasolanna babaen ti panagserbina ngem saan latta a nagpakita isu nga inkeddengdan nga impakaammo kadagiti otoridad.
