VIGAN CITY – Nakemmeg ni Joselito Reyes Fabian, agtawen iti uppat a pulo ket lima nga agnaed idiay Bateria, San Esteban ta ginandatna a bagkongen ti maysa a barangay kagawad idiay Villa Quirino.
Nabigbig ti biktima a ni Brgy. Kgwd. Tessie Lucero Imperial, agtawen iti innem a pulo ket dua nga agnaed iti Villa Quirino nga aglaklako iti BBQ idi dimteng ti suspek.
Iti pannaki-uman ti Bombo Radyo Vigan ken ni PLT. Christopher Pola ti PNP San Esteban, nabartek ti suspek ket mapapati nga adda gurana iti biktima isu nga idi dimteng ket nakaiggem iti kutsilyo nga inlayatna iti asideg ti akin kannawan a bakrang ti biktima ngem naglisi babaen iti akin kannawan nga imana nga isu ti natirwan.
Naipaagas iti ospital ti biktima para iti pannakatamingna idinto a ti suspek ket nakakustodiyan iti San Esteban Municipal Police Station pakairamanan dagiti naala kenkuana a kumpay ken kutsilyo.
