VIGAN CITY – Nabuy-bust ni Russele Dasalla, agtawen iti tallopulo ket siam a taga-San Roque, Santiago, karaman iti PDEA drug watchlist ket sangwenna ti kaso a panaglabsing iti Republic Act 9165 wenno Comprehensive Dangerous Drugs Act of 2002.
Iti pannakiu-uman ti Bombo Radyo Vigan ken ni PLt. Godofredo Ribuyaco, naipakaammo iti Santiago nga adda riribuk iti nasao a barangay isu a nagrespondeda ket naibaga dagiti barangay official a dangdangran ti suspek ti nobiana a ni Judy Ann Gagarin, agtawen iti duapulo ket dua a taga-Bagbagotot, Banayoyo ta mapapati nga adda sabali a babai ti suspek ken nabartek iti dayta a gundaway.
Awan ti suspek a nadanunan dagiti pannakabagi ti linteg ngem nasarakanda met laeng a magmagna isu a naipan iti barangay hall para laeng koma iti komprontasyon ngem idi makapkapan isuna ket inruarna ti tictac box ket impurwakna kadagiti barangay official ken dagiti pulis.
Ti tictac box ket naglaon iti maysa a heat sealed transparemy plastic sachet ti shabu nga agdagsen iti 0.03 gram nga aggatad iti PHP1K, dua a heat sealed transparent sachet a naglaon iti napagango a bulong ti marijuana nga agdagsen iti 0.05 grams nga aggatad iti PHP500.
Naikustodian iti Santiago Police Station ti suspek pakairamanan dagiti naala kenkuana nga ebidensya tapno maidalan iti husto a proseso.
