Kaso nga attempted homicide ti sangwen ti suspek a nangbansag iti bato iti ulo ti kinainumanna idiay Barangay Salvador 1st, Candon City, Ilocos Sur.
Ti biktima ket agtawen iti uppat a pulo ket uppat, residente iti nadakamat a barangay idinto a ti suspek ket agtawen iti tallopulo ket lima residente iti Barangay Linteg, ili ti Banayoyo.
Iti pannaki-uman ti Bombo Radyo Vigan ken ni PLT. Jovelyn Antalan, ituloy ti biktima a pilaan iti kaso ti suspek gapu iti sinagrapna.
Agtultuloy ita ti panagpaimbag ti biktima ta maibasar iti duktal dagiti doktor a nangtaming kenkuana ket posible nga umabot iti innem agingga walo ti healing period-na.
Gapu iti pannakabansag iti bato ti ulo ti biktima ket nagsagaba daytoy iti traumatic brain injury, mild complication, compound fracture ken hematoma iti right frontal-na, kasta payen nga adda dunor iti mugingna.
Basar ti imbestigasion, naginom ti biktima, suspek ken dua pay a kadua da iti pagtaengan ti maysa a gayyemda sakbay nga intuloyda ti panaginom iti pagtaengan ti biktima ket idi naka-inom da pay iti dua a bote ti arak, nagpakada ti biktima a saan nan a kayat ti uminom ta makaturturogen.
Ngem kalpasan ti sumagmamano a minutos, rimmuar ti biktima iti salas-da tapno kitaen no nakapanaw dagiti kadunan ket nakitana ti suspek iti igid ti kalsada a nakaiggem iti bato.
Mapapati a bigla nga imbato ti suspek nga iggemna ket napuntaanna ti ulo ti biktima sakbay a naglibas a naglugan iti motorsiklo.
