VIGAN CITY – Kaso a frustrated homicide iti sangwen ti maysa a lalaki a nangbagkong iti kumpadre na idiay Barangay Cabaroan, Bantay idi kalman.
Nabigbig ti suspek a ni Jeffrey Reyes, agtawen ti tallo pulo ket tallo, maysa a tricycle driver ken agnaed idiay Brgy. Cabaroan, Bantay nga adda idiay Bantay Male Custodial Facility idinto a ti biktima ket ni Roque Corpuz nga agtawen ti uppat a pulo ket dua, naasawaan, tricycle driver ken agnaed iti nasao met laeng a lugar.
Nadakamat ti suspek a nalaus iti bartek na idi napasamak iti krimen ket kinunana, inpagarup na a ti biktima ti maysa kadagiti nangtapis kenkuana ta agiin-innangaw da agingga nga adda iti komosyon a napasamak.
Agsipud iti dayta, nakapungtot ti suspek ket nangala iti imuko sa na binagkong ti biktima a ti agdama ket nakaruwaren iti ospital kalpasan iti pannakataming dagiti dunor a sinagaba na.
