VIGAN CITY – Nakemmeg babaen iti hot pursuit operation ti maysa a lalaki a nangbagkong kadagiti tallo a kalugaranna idiay Sitio Palabi, Barangay Mabilbila Sur, Santa, Ilocos Sur.
Nabigbig ti suspek a ni Reymar Comilang Bajet, agtawen iti tallopulo ket pito, maysa a mangngalap, agnaed iti Barangay Mabilbila Sur, Santa.
Dagiti biktima ket da Leonardo Balallo Alves, agtawen iti uppat a pulo ket pito, mannalon; Marvin Advincula Bagorio, agtawen iti duapulo ket uppat, construction worker; ken maysa a lalaki nga agtawen iti sangapulo ket innem.
Nakaawat iti tawag ti Santa Muncipal Police Station iti tawag manipud iti concerned citizen a mangipakpakaammo nga adda napasamak a pammagkong iti lugarda ket idi makadanun dagiti pannakabagi ti linte, nakitada dagiti tallo a biktima a nagsagaba iti dunor gapu iti pammagkong.
Segun kadagiti witness, nakangngegda iti riri ket idi rimuarda kadagiti pagtaenganda, naklaatda gapu iti komosyon iti nagbaetan ti suspek ken dagiti biktima.
Nakitada a nangasot ti suspek iti kutsilyo manipud iti bakrangna ket binagkongna dagiti biktima sa nagtaray a napan iti pagtaenganda.
Natakuatan a ti suspek ken dagiti biktima ket nakainom idi mapasamak ti insidente.
Narekobre met ti patadem nga inusar ti suspek nga ita ket nakakustodian iti Santa Police Station tapno maidalan iti husto a proseso.
