VIGAN CITY – Kaso a frustrated murder ti sangwen ni Arnold Arista, agtawen ti uppat a pulo ket uppat, maysa a construction worker nga agnaed idiay Anonang Mayor, Caoayan gapu iti panangbagkongna kadagiti kaanakanna.
Nabigbig dagiti biktima a da Herbert Bautista, agtawen ti duapulo ket siam ken ni Reymundo Bautista, agtawen ti tallopulo ket innem nga agpada nga agnaed iti nasao a lugar.
Segun kenni Pol. Capt. Henry Garcia, hepe ti Caoayan Police Station, matmaturog dagiti biktima iti uneg ti pagtaenganda idi nangngeganda nga adda ti mangpwerpwersa a manglukat ti ridawda ket idi linukatan ni Reymundo, nakitana ti ulitegda nga agtaktakder a nakaiggem ti armas sa binagkongna ti tyan ti maysa met la a kaanakanna a ni Herbert.
Insigida a tinulongan ni Reymundo ti kabsatna ngem binagkong met la ti suspek ti akin-kannigid a barukong ken tengngedna.
Kabayatanna, ikalintegan ti suspek nga isuna ket saan a makaturturog ken awan isuna iti usto a panagpanpanunotna iti dayta a gundaway.
No pay kasta ket mapapati nga adda iti riri iti nagbaetan dagiti biktima ken ti suspek maipanggep iti daga.
