VIGAN CITY – Addan iti kustodia ti Caoayan Police Station ni Stephen Rafal Rebaula, agtawen iti duapulo ket uppat, mangngalap, agnaed iti Barangay Puro, Caoayan gapu ti panangbagkongna iti kabsatna a ni Jomar Rafal Rebaula, agtawen iti duapulo ket uppat.
Personal a nagturong ni Edward Rafal Rebaula, agtawen iti duapulo ket innem, security guard, agnaed iti Barangay Puro kadagiti pannakabagi ti linteg tapno ireport ti napasamak a pammagkong iti nasao a lugar.
Segun iti maysa a witness iti pasamak, adda nagririan ti biktima ken ti naun-una a kabsatda a ni Jonnel Rafal Rebaula maipanggep iti utang ti inada iti biktima, idin ta napan naganawa ti kabsatda met laeng a ni Oliver Rafal Rebaula.
Naisawang ti suspek iti biktima ti balikas a “kasla lang adda maitultulongmo” ket napan nangala ti suspek iti kutsilyo iti kuartona nga idi nagsubli ket isu ti imbagkongna iti naminsan a daras iti akin-kannigid a tyan ti biktima.
Kalpasan dayta a pasamak, impan ni Oliver ti suspek iti pagtaengan ti ulitegda a ni Jovic Rafal idinto a ti biktima ket naitaray iti Ilocos Sur Gabriela Silang Hospital para ti naan-anay a pannakatamingna.
Simmuko ti suspek ken ni Barangay Captain Ronnie Cabanig ken naiturn-over met iti police station tapno maidalan iti husto a proseso.
