VIGAN CITY – Murder ti naipila a kaso kontra ken ni Jimmy Ramos, agtawen iti uppat a pulo ket maysa a taga-Tamorong, Sta. Catalina a nangbagkong iti namin-limapulo ket siam a daras iti ipagna a ni Marilyn Ramos, agtawen iti uppat a pulo ket walo a residente iti nasao a lugar.
Ti panagtsimis ti biktima ti mapapati a nagtaudan ti krimen isu a nagriri ti nabartek a suspek ken biktima a napan pay nagkamang iti family house-da ngem sinurot ti suspek ket binagkongna babaen iti screw driver ti biktima a puon ti nakatayanna.
Nagpakpakaasi ti biktima a dimmawat iti pammakawan bayat ti panangbagkong kenkuana ti suspek ngem saannan nga inkaskaso ket intultuloyna a binagkong.
Naalan dagiti pannakabagi ti linteg dagiti ebidensya a mangtulong iti naan-anay nga imbestigasyonda idinto nga iggemdan ti suspek tapno dumalan iti husto a proseso.
