VIGAN CITY – Insalakan ti Magsingal Fire Station babaen ti panangidaulo ni SF03 Richard D. Garcia Officer in Charge Municipal Fire Marshal ti maysa a lalaki a nakoriente iti gasolinaan idiay Sta Monica, Magsingal.
Nabigbig ti biktima a ni Jay-R Duko, agtawen iti duapulo ket walo a taga-Sta Maria, Isabela.
Iti pannaki-uman ti Bombo Radyo Vigan ken ni Garcia, nakaawatda ti tawag nga adda iti nakoriente nga isu ti dagus a tinurongda.
Patienda a nasagid ni Duko ti live wire a puon iti pannakakorientena.
Pinagtitinnulunganda nga imbaba ti biktima a nakapasar iti burn iti kannawan a sakana ngem nangipaayda iti first aid sakbay a naipaagas iti Ilocos Sur district hospital para iti naan-anay a pannakatamingna.
Balakad ni Garcia kadagti adda iti kasta a trabaho nga agisuot iti personal gear tapno maliklikan ti aniaman a pagpeggadan.