--Ads--
VIGAN CITY – Nakemmeg ti maysa a lalaki a sumangsango ti kaso idiay Barangay Purag, Sinait idi alas nuwebe y media iti agsapa idi kalman babaen iti puwersa ti Sinait Municipal Police Station nga indauluan ni Police Capt. Bryan Tacazon.
Nabigbig ti suspek a ni Edison Mangrubang nga agtawen ti uppat a pulo ket pito, naasawaan, maysa a karpintero ken agnaed iti nasao a lugar a sumangsango iti kaso a frustrated homicide.
Ti pannakakemmeg ti suspek ket babaen iti bileg ti warrant of arrest nga inparuwar ni Hon. Homer Jay Ragonjan, presiding judge ti Regional Trial Court, Branch 24, Cabugao a napetsaan idi October 22 iti agdama a tawen.
Ti agdama, addan iti kustodiya iti nasao a police station ti suspek.
