VIGAN CITY – Sumango iti kaso nga Illegal Possession of Firearms ni Jimmy Velasco Reyes, agtawen iti limapulo ket lima, mannalon, agnaed iti Barangay Remedios, Cervantes gapu ti panagikotna iti saan a rehistrado a paltog ken ti aksidente a pannakapaltogna iti bagina.
Iti pannaki-uman ti Bombo Radyo Vigan ken ni Police Major Christopher Ramat, maki-ininom ti biktima iti kalapawna idin ta inruarna ti paltogna a caliber 22 ta maipagarup nga ipakitana daytoy kadagiti kaduana.
Ngem nupay kasta, aksidente a nakalbit ti biktima ti trigger ti paltog a nakapuntaan ti akin-kannawan a luppona ket naipaagas iti ospital para ti pannakatamingna.
Kabayatanna, kaso a murder met ti sangwen ni Aris Ladiong Yang-I, agtawen iti sangapulo ket siam, agnaed iti Barangay Aluling, Cervantes gapu ti aksidente a pannakapaltogna iti natay a biktima a ni Omar Abdul Sawey, agtawen iti duapulo ket innem, agnaed iti nasao a lugar.
Pinasingkedan ni PMAJ. Ramat nga agin-inom ti suspek ken biktima idin ta napan naturog ti biktima idinto a daytoy suspek ket mapapati nga inruarna ti paltogna ngem nakalbitna ti trigger ket napuntaan ti biktima a puon ti nakatayanna.
Aminado ti suspek iti pannakapapatayna iti biktima kasta met nga impaimanan kadagiti pannakabagi ti linteg ti calber 45 a paltog a naaramat.
