VIGAN CITY – Nakapagtutulagen dagiti karaman iti aksidente ti dua a menor de edad a nag-motorsiklo ken maysa a driver ti toyota FX iti provincial road iti Brgy. Caburao, Santiago.
Iti pannaki-uman ti Bombo Radyo Vigan ken ni PLt. Godofredo Ribuyaco iti Santiago Municipal Police Station, bayadan amin a gastos iti ospital ti driver ti Toyota FX a ni Carlos Dongalen Kitoyan, agtawen ti duapulo ket walo, baro nga agnaed idiay Bab-asig, Patiacan, Quirino kalpasan iti pannadungparna kadagiti nagkalubbon ti motorsiklo nga agpada a menor de edad a nakatayan ti maysa kadakuada a ni Christreal Versoza, agtawen ti sangapulo ket uppat, estudyante nga agnaed idiay Brgy. Caburao, Santiago gapu iti head injury idinto a nakadunoran ken nakatukkolan ti saka ti nagmaneho a ni John Yrolle Galanga nga agtawen ti sangapulo ket lima a taga-Brgy. Poblacion, Banayoyo.
Segun ken ni Ribuyaco, nagmotorsiklo dagiti menor de edad ta mapanda koma agpakada a makiay-ayam ti basketball idinto a mapan koma iti baybay ti naka-Toyota FX kas panangrambak ti baro a tawen.
Maipalagip nga agpada nga agpapalaud a direskyon dagiti nagmaneho a ti adda ti likod ket ni Kitoyan idin nagsikko ni Galanga a gappuanan ti pannakaidarusdos da iti maysa a pagtaengan.
