VIGAN CITY – Temporaryo a nawaya-wayaan ti lalaki a nakadungpar ken ni Elizabeth Gallego nga agtawen ti innem a pulo a poon iti nakatayan na idiay sanguwanan ti Ilocos Sur Provincial Hospital – Gabriela Silang idi naminsan nga aldaw.
Nakapagpiyansa ni Dan Ryan Guillen nga agtawen ti tallo pulo, baro ken agnaed idiay #52 Rizal Street Brgy. 3 Vigan City ti dua pulo ribo a pisos isu a temporaryo a nawaya-wayaan manipud ti Vigan City police station- custodial facility.
Nairana a nanggeg ti pamilia ti suspek iti interview ti Bombo Radyo Vigan iti pamilya ti biktima isu a napan da iti police station ket nagdesisyon da a pyinansaanda ni Guillen agsipud ta desidido iti pamilya ti biktima a mangidarum kenkuana.
Sakbay iti dayta, plano ti pamilia ti suspek iti mapan koma maki-alegro inton maitabon ti biktima ngem gapu iti nanggegda iti radyo ket napan da laengen iti police station tapnu piyansaan da ni Guillen.
Mainaig dayta, addan to iti maisayangkat a pre-trial inton alas dos iti malem ti December 19 inaig iti kaso a Reckless Imprudence resulting in homicide and damage to property ken panaglabsing iti republic act 10586 wenno ti anti-drunk driving law a naipila kontra ti suspek.
