VIGAN CITY – Nakemmeg ti maysa a lalaki gapu ti panagtakawna iti relief goods ken panaglabsingna ti Republic Act 10591 iti ili ti Narvacan, Ilocos Sur.
Nabigbig ti suspek a ni Bonifacio Rebellion Ciubal, agtawen ti tallopulo ket dua nga agnaed idiay Brgy. Sta. Lucia, Narvacan.
Maibasar ti pakaammo manipod Narvacan Municipal Police Station, nakaawatda ti tawag manipod kadagiti Brgy. Official idiay Brgy. San Jose narvacan ta nakitada a nagtakaw ti suspek ti relief goods iti alas kuatro iti bigat nem nakalibas laeng.
Insayangkat dagiti pannakabagi ti linteg ti hot-pursuit operation a gappuanan ti panankakemmeg ti suspek iti pagtaengan ni Arnel Cabela nga agnaed iti Brgy. San Jose, Narvacan.
Saan laeng a panagtakaw ti inaramid ti suspek ta naala manipod kenkuana ti maysa a magazine assembly para iti Clock 9 mm pistol nga addaan ti siam a piraso ti live ammunition ken maysa a kutsilyo.
Nasaludsod ti suspek nu nangipananna dagiti relief goods agingga nagturongda iti pagtaengan ti kabsatna a ni Marilyn Ciubal iti nasao met laeng a barangay a nakakitaandan ti maysa a case ti soft drinks nga aggatad ti tallogasut innem a pulo a pisos, nadumaduma a relief goods nga aggatad ti pitogasut a pisos, dua a black plastic box nga aggatad ti duaribo a pisos, maysa a nalabbaga a bag a naglaon ti black belt bag ken dashboard camera nga aggatad ti limaribo a pisos.
Iti agdama, addan ti kustodiya dagiti pannakabagi ti linteg ti suspek tapno dumalan ti husto a proseso.
