Iberberipika ti Vigan City Police Station no ti lalaki a nagtakaw iti Vigan Cathedral ket isu met laeng ti suspek kadagiti naglabas a panagtakawan iti lugar.
Iti pannaki-uman ti Bombo Radyo Vigan ken ni PLTCOL. Catalino Gadia Jr., kinunana nga agpada ti pannakailadawan ti suspek kadagiti CCTV footage ken statement dagiti witness isu nga agtultuloy a duktalenda tapno masulbar met laeng dagiti kaso a posible a nakairamananna.
Innayon ni Gadia a ti suspek ket saan a pudno a mangmangged iti Vigan City numan pay kunana a construction worker ta ti kinapudno ket naggapu iti Abra ken posible a pudno a gagarana ti agtakaw.
Inrason ti suspek a naaramidna ti agtakaw gapu ta agkasapulan unay iti dakkel a gatad para iti pagpaagas iti asawana a masakit.
Maipalagip a maysa a concerned citizen ti nangipakaammo kadagiti pannakabagi ti linteg mainaig iti panagtakaw ti suspek isu a dagus met a nagrespondeda, ket nadanonanda daytoy a bumab-baba manipud iti scaffolding ti simbaan.
Nupay kasta, napilaanen iti kaso a robbery ti suspek.
