VIGAN CITY – Manarimaan iti pannakasapul ti maysa a lalaki a nagtakaw ti pitaka iti compartment iti maysa a motorsiklo ti idiay Brgy. 2, Vigan City, Ilocos Sur.
Iti pannaki-uman iti Bombo Radyo Vigan ken ni Bryan Raganit a biktima, imparkingna iti motorsiklona nga addaan iti pitaka iti compartment-na iti batog ti pagtaengan ti nakaikamanganna ngem idi nagsubli ket napansinna laengen a mapukpukawen iti pitakana.
Segun ken ni Raganit, babaen iti CCTV iti nasao a barangay ket nakitada iti napasamak a panangala ti maysa a lalaki iti wallet ngem saanda a mabigbig ta nakakallugong, naka-face mask, ken naka-iggem iti sarrukod.
Patienna nga ammonan iti araramiden ti suspek ta nalakana laengen nga innala iti pitakana a naglaon iti kuarta nga addaan iti iti P2,500-P3,000 a kuarta, ATM ken amin nga ID-na.
Kiddawna kadagiti nakakita wenno makabigbig ti suspek nga ipakaammoda laeng iti Vigan City Police Station tapno maisublin dagiti ID-na ket uray saanen ti kuarta.
Pinalagipanna pay dagiti padana a motorista nga agannad kadagiti napapateg a gamitda ket saan nga agtalek lattan nga ipan iti compartment iti lugan nu panawanda.
