VIGAN CITY – Kaso a robbery ti sangwen ni Christin Gallano Acosta, agtawen ti duapulo ket uppat nga agnaed idiay Brgy. Paras, Candon City gapu iti panagtakawna kadagiti alikamen iti pagtaengan a kukua ni Rosie Mique Is-isa, agtawen ti uppat a pulo ket walo a taga-La Union ngem bambantayan ti caretaker a ni Cristina Lacamiento a taga-Brgy. Calliat, Balaoan.
Iti pakauna nga imbestigasyon, impakaammo ni Lacamiento ken ni Brgy. Capt. Darius Busini ket atapenna a karuba ti suspek ti nagtakaw isu a napan iti pagtaenganda ket nakitana ti electric fan a maysa kadagiti mapukpukaw nga alikamenda kas binigbig ti caretaker.
Naala kenkuana ti electric fan nga aggatad ti pitogasut a pisos, dua a pungan nga aggatad ti duagasut a pisos, kitchenware set nga aggatad ti sangaribo a pisos ken ti sangapulo ket tallo a steel bar a ti kaatiddugna ket dua a metro.
Naduktalan a ti simrekan ti suspek ket iti open space iti tuktok ti isim ta nakakandado ti ridaw a mapan iti kusina ti nasao a pagtaengan.
