Kaso a theft ti sangwen ti lalaki a nagtakaw iti manok a pangtadi nga aggatad iti P12,000 idiay Sitio Pantar, Barangay Villa Hermosa, Sta. Cruz, Ilocos Sur.
Biktima iti nasao a panagtakawan ti maysa a lalaki nga agtawen iti duapulo ket maysa idinto a ti suspek ket agtawen iti duapulo ket dua, agpada nga agnaed iti nasao a lugar.
Iti pannaki-uman ti Bombo Radyo Vigan ken ni Police Major Pol Vinsent Tadeo, saanen a naipakat ti hot pursuit operation ta awanen ti suspek iti probinsia ngem impilada latta ti kaso tapno manamnama nga iti masangwanan ket mairuaranto met laeng iti warrant of arrest.
Maibasar iti naan-anay nga imbestigasion dagiti pannakabagi ti linteg, nasabat pay laeng ti biktima ti suspek idi pumanaw iti pagtaenganna ngem saanna nga impagarup a mapan daytoy agtakaw.
Idi madanon iti alas dose y media iti tengnga ti rabii, nakadlaw met ti maysa a witness a karruba ti biktima nga agkara-taol ti aso ken adda kumarasakas isu a linukatanna ti tawa ket nakitana ti suspek a mangluklukat iti kulongan ti manok sa nangitaray iti maysa.
