VIGAN CITY – Agtultuloy iti imbestigasyon dagiti pannakabagi ti linteg nu adda pay sabali a nabiktima ti lalaki a nagtakaw kadagiti manok idiay Barangay Padu Grande, Sto. Domingo, Ilocos Sur idi 9:50PM iti August 10, 2024.
Ti suspek ket Reynaldo Banaga, agtawen iti uppat a pulo ket maysa, pintor a taga-Barangay Zone 5, Bantay idinto a ti biktima ket ni Alain Pineda Aldana, agtawen iti limapulo, negosyante, taga-Barangay Bahet, San Ildefonso.
Iti pannaki-uman ti Bombo Radyo Vigan ken ni PCapt. Joseph Fieldad manipod iti Sto. Domingo Municipal Police Station, impakaammo kadakuada ti biktima iti in-inut a panagpukaw dagiti manokna uray pabaliw-baliw iti katalekna iti talon isu a naisayangkat ti entrapment operation a nakakemmegan ti suspek.
Segun ken ni Fieldad, namin-ano a daras a napukawan ken adda pay dagiti natay a manok ti biktima isu a nagsukat ti katalekna ngem idi kabagyannan inayabanna a mangkita kadagiti tarakenna ket isun ti nakaduktal ti aramid iti suspek isu nga impakaammona iti biktima a gappuanan ti panangireportda kadagiti otoridad.
Inlawlawag ni Fieldad a masansan iti talon ti suspek ta asideg a kabagyan ti asawa ti biktima isu a saan a sabsabali kadakuada isu a saanda nga impagarup a maaramidna dayta.
Naduktalan pay dagiti otoridad a ti suspek ket datin a drug surenderee iti ili.
Dakkel met ti maitulong iti kaso dagiti nakita a conversation iti cellphone ti suspek manipod kadagiti katransaksyonna iti panagilakona kadagiti al-alaenna a manok ta nailanadna nu pagal-alaanna.
Palagip ni Fieldad kadagiti agtartaraken ti dingwen iti panagannad ti panangpili kadagiti talken tapno saan a maisagmak ti negosyo a bangonen.
VIDEO – PCAPT. JOSEPH FIELDAD
