VIGAN CITY – Nakemmeg ti maysa a lalaki a nagtakaw iti kalding iti Brgy Angkileng, ili ti Sta Lucia.
Nabigbig ti suspek a ni Ryan Sanchez, agtawen iti tallopulo ket dua, construction worker a taga-Brgy Burgos, Sta Lucia idinto a ti biktima ket ni James Joseph Tobias, agtawen iti innem a pulo ket innem, naasawaan a taga-Brgy Burgos met laeng.
Napan kinita ti biktima dagiti tarakenna iti ayanda idi natakuatanna nga adda mapukpukaw a kaldingna a babai ken lalaki ket atapenna a natakaw.
Insigida nga inreport-na iti kapitan iti ayanda isu a naipadanon iti Sta Lucia Police Station.
Sigudd a rinespondean dagiti pannakabagi ti linteg ti nasao a pasamak ket nakemmeg ti suspek iti Brgy Burgos.
Nupay kasta, naala metlaeng ti dua a napukaw a kalding ni Tobias.
Addan iti Sta Lucia Police Station ti suspek para iti documentation ken proper disposition.
