Napilaanen iti kaso a qualified theft ti maysa a lalaki a nagtakaw iti nasurok sangagasut a ribo a pisos iti JTC Superstore – Balaleng, Bantay, Ilocos Sur.
Nabigbig ti suspek a ni Arnel Badana Rstibada, agtawen iti tallopulo ket pito, kahera, taga-Barangay Baggoc, Caoayan ngem agkaskasera iti Barangay Balaleng.
Ti met nagreklamo ket ni Benedicto Cardenas, Security Consultant ti New Javier Trading Corporation, wholly owned subsidiary ti JTC Group of Companies, ken residente ti Quezon District, Santa, nga isu ti nangipakaammo iti Bantay Police Station iti mapapati a saan a panagiremit ti suspek iti kuarta a naglakoan ti kompania.
Iti pannaki-uman ti Bombo Radyo Vigan ken ni Police Captain Sherwin Beroña, aminado ti suspek a sipud idi 2023 ket saanna nga ipa-punch dagiti item a gatangen dagiti customer gapu ta kasapulanna iti kuarta.
Inamin pay ti suspek a ti panagtakawna ket babaen iti panangiposisionna ti bagina nga adayo iti CCTV camera ken ibulsana ti kuarta a takawenna.
Maibasar iti imbestigasyon, October 16, 2024, nakaawat ni Mary Fe Parra, Human Resources and Administrative Services Manager iti inaig iti mapapati a panagtakawan iti beverage counter.
Dagus nga impakaamo ni Ms. Parra ti Finance Department Operations Audit Team ken nangisayangkat iti inventory count iti beverage counter iti imatang ti suspek ken ti supervisor na ket natakuatan nga umabot iti P101,013.75 ti stock shortage da kas maibasar iti final inventory.
