Inamin ni Clarence Rabor Piol, agtawen iti tallopulo ket dua a taga-barangay Labnig, San Juan nga adda kakunsabusna a taga-Department of Agriculture iti panagtakawna iti ganagan.
Iti pannaki-uman ni Bombo Radyo Vigan ken ni Piol, walo a sako ti naurnongna kadagiti lima a daras a panagtakawna a dagitoy ket inlakona iti 1,500 kada sako.
Iti umuna a gundaway ket adda kaduana isu a naikargada ti dua a sako idinto a saggaysa a sakon kadagiti simmarsaruno nga aldaw.
Ibagbaga ti suspek a ti malakoanna ket pagbayadna ti utang ken pagarakna.
Kabayatanna, pinasingkedan met ni Barangay Captain Alvaro Azcueta Jr nga impudno met ti suspek nga adda tallo a kalugaranna a nagilakoanna kadagiti ganagan ket narekobre metten dagiti dadduma.
Nupay kasta, nagbalakad a saan a tuladen ti inaramid ti suspek no di ket mangged laengen iti nadaydayaw a wagas.
Maipalagip nga idi October 5 a rinugian ti suspek a nagtakaw kadagiti abono.
