VIGAN CITY – Nakemmeg ti maysa a lalaki ta nagtakaw iti bisikleta iti maysa a pulis idiay Crisologo St., Brgy. 1, Vigan City.
Nabigbig ti suspek ket ni Jordan Lopez Rapin, agtawen ti tallopulo ket dua, naasawaan nga agnaed idiay Brgy. Bahet, San Ildefonso idinto a ti biktima ket ni Pat. Alvin Alviar, naasawaan, PNP member a na-assigned iti Vigan City Police Station/SWAT nga agnaed idiay Brgy. Ayusan Norte, Vigan City.
Maibasar iti inisyar nga imbestigasyon ti PNP Vigan, nakaparking iti bisikleta a nai-isyu ken ni Pat. Alviar iti sanguanan iti tourist assistance office iti siudad ti Vigan idi nakita ti witness a ni Charlie Macabeo, duty traffic iti Vigan City a linuganan ti bisikleta ni Rapin nga immadayo iti nasao a lugar.
Insayangkat dagiti kameng ti PNP Vigan iti hot pursuit operation a nagresulta iti pannakaala iti bisikleta ken pannakakemmeg ken ni Rapin idiay Brgy. Capangdanan, Bantay isu a naipan iti Vigan City Health Office ket dimmalan iti medical examination.
Iti agdama, addan iti kustodiya kadagiti pannakabagi ti linteg ti suspek tapno dumalan iti husto a proseso.
