VIGAN CITY – Kaso a theft ti sangwen ni Dominic Soliven, agtawen-iti-duapulo ket tallo, construction worker a taga-Pangpangdan, Sto. Domingo ta nagtakaw idiay Brgy. Sived a datin nga adda madi nga aramidna.
Iti pannaki-uman ti Bombo Radyo Vigan ken ni PLt. Johnjohn Garan, Officer in charge ti Sto. Domingo PNP, nakita ti biktima a ni Jeffrey Galinato, agtawen-iti-tallopulo ket innem, BFP member a taga-Basug, Santa ti suspek nga agsipsiput iti aglawlaw ti lugan ket tinakawna ti nangisit a sling bag a naglaon iti Glock 22 caliber 40, maysa a magasin ti caliber 40, maysa a magasin iti Glock caliber 9mm, tallopulo ket innem a piraso iti live ammunition ti caliber 40 nga aggatad iti PHP62,900, PHP2,000 ken ATM card.
Binugkawan ti biktima ti suspek idi naduktalanna a linukatanna ti lugan ken innala dagiti alikamena ngem insigida a pinataray ti suspek ti motorsiklona a naglibas isu a sinurot ti biktima ken nagpatulong iti Sto. Domingo PNP.
Gapu ti dayta, nangisayangkatda ti hot pursuit operation ket nakemmeg ti suspek iti pagtaenganda ti live-in partner-na idiay Brgy. Vacunero.
Kabayatanna, nasarakan iti kalsada idiay Brgy. Cabaroan, Magsingal ti sling bag a mapapati nga imbelleng ti suspek idi naglibas.
