VIGAN CITY – Agtutuon a kaso kas ti panaglabsing iti Article 148 ken 151 iti Revised Penal Code, Republic Act 1132, Direct assault ken Disobedience to a person in authority ti sangwen ti maysa a lalaki a nagprobokar idiay Poblacion, Sta. Catalina.
Nabigbig ti suspek a ni Francis Rotor, agtawen ti tallopulo ket walo nga agnaed iti Brgy. Lubong, San Vicente idinto a dagiti biktima ket da Egilberto Rapisura, agtawen ti limapulo ket maysa ken ni Joseph Pula, agtawen ti uppat a pulo ket maysa, agpada a Brgy. Kagawad ken agnaed iti Poblacion, Sta. Catalina.
Segun ken ni P/Lt. Jomar Castro iti San Vicente Municipal Police Station, napan idiay Daet Furniture ti suspek a luklukatanna ti gate ket idi sitaren dagiti nakaduty a barangay official ket pinagsawsaw-anna pakairamananen dagiti pannakabagi ti linteg sa dinangranna pay ti maysa a kagawad.
Mapapati a nabartek ti suspek ken adda iti parikut ti panunotna ngem kuna met ti inana a natalna ti anakna isu a nakigtot idi madamagna a nagprobokar.
Iti agdama, awan pay ti inlatang ti korte no mano iti pagpyansa ti suspek para iti pannakawayawayana ken adda pay laeng iti kustodiya iti San Vicente Municipal Police Station tapno dumalan iti usto a proseso.
