Maysa a lalaki ti nakemmeg gapu iti panagprobokarna idiay Barangay Padu Chico, Sto, Domingo, Ilocos Sur.
Nabigbig ti suspek a ni Julius Tagelo Tabil, agtawen iti tallopulo, construction worker, agnaed iti Barangay Padu Chico.
Iti pannaki-uman ti Bombo Radyo Vigan ken ni Police Master Sergeant Maximino Ramos Jr, alas nuebe iti bigat idi kalman (November 1), nabartek ti suspek ket nagprobokar iti pagtaenganda ta nagiburak pay iti bote ti arak isu nga inreportna kadagiti barangay official ket naanawada met.
Nagtultuloy ti panaglaaw-laaw ti suspek isu a binagaan ti pamiliana nga agsardeng ngem saanna a dinengngeg ket nagmalmalem a nagprobokar isu a nagparespondeda manen, puon ti pannakakemmegnan.
Naamuan pay a ti suspek nga iti naglabas a lawas ket dinadaelna manen ti refrigerator da.
Sisasagana met a mangipilan iti kaso ti pamiliana ta kayatdan nga agnakem agsipud ta tunggal makainom ket aramidna ti agprobokar.
