Nakemmeg ti maysa a lalaki a nagprobokar nga armado iti iligal a paltog idiay Barangay Quimmarayan, Bantay, Ilocos Sur.
Ti suspek ket agtawen iti limapulo ket pito, agnaed iti nasao a lugar.
Iti pannaki-uman ti Bombo Radyo Vigan ken ni Police Captain Donaldson Pagalanan, nadanonanda ti suspek nga aglalaaw iti kalsada ngem idi makitana dagiti pannakabagi ti linteg ket dagus a timmaray ken indissona ti armasna a 12-gauge homemade shotgun.
Maibasar iti imbestigasionda, adda nagririan ti suspek ken ti kaanakanna.
Mapapati a napunwan ti suspek iti pananguy-uyaw kenkuana ti kaanakanna isu a napanna inubor ken inruarna ti paltogna nga adda kargana a maysa a bala.
Nupay kasta, sangwen ti suspek ti kaso nga Alarms and Scandal ken panaglabsing iti Republic Act 10591 wenno Comprehensive Firearms and Ammunition Act.
