VIGAN CITY – Direct Assault of Person in Authority ken panaglabsing iti Republic Act 9262 wenno Anti-Violence Against Women and Their Children Act ti sangwen ni Marcelino Gapang, agtawen iti tallopulo ket walo a taga-Brgy. Butol, Santiago gapu ti panangkabilna iti asawa ken putotna kasta payen ti panangpangtana kadagiti barangay official.
Iti pannaki-uman ti Bombo Radyo Vigan ken ni PLt. Godofredo Ribuyaco, nagipulong kadakuada ti asawana a ni Mariane Gapang a kabkabilen isuna ti suspek pakairamanan ti anakda.
Nagrespondeda ket nadanunda ti suspek iti pagtaenganna a nakaiggem iti buneng ken nangisawang iti agkakadakes a balikas kadagiti opisial.
Ginandatna pay a dangran ti suspek ni Brgy. Captain Lilia Pitt ken ti barangay tanod ngem nakalisida ket idi manen nakadanunda iti police station, dinanugna iti rupa ti maysa a pulis iti namindua a daras.
