Maysa a lalaki ti nakemmeg idiay Barangay Dadalaquiten, Sinait, Ilocos Sur gapu iti panagpaputokna iti paltog.
Nabigbig ti suspek a ni Joey Brun Yadao, agtawen iti uppat a pulo ket maysa, agnaed iti nasao a lugar.
Nakaawat ti Sinait Police Station iti tawag manipud iti maysa a concerned citizen, a mangipakpakaammo kadagiti nagsasaruno a putok ti paltog a nangngegda iti sangwanan ti barangay hall.
Insigida a nagresponde dagiti pannakabagi ti linteg ket idi makadanonda iti lugar, insuko dagii dua a barangay tanod a da Jestoni Cereza ken Johny Ilac dagiti lima a fired ammunition.
Kinita dagiti pannakabagi ti linteg ti CCTV footage a naikabil iti lugar ket nakitada ti suspek ken ti yellow a bisikleta a naglaon iti maysa a magasin ti dua nga intact live rounds, jacket ken bush hat, iti sangwanan ti pagtaenganna.
Binagaan dagiti pannakabagi ti linteg ti suspek a rumuar iti pagtaenganda ngem saanna nga inkaskaso iti damo.
Intudo met dagiti witness ti suspek nga isu ti nagpaputok iti paltog isu a dagus a kinemmeg dagiti pannakabagi ti linteg.
Ti suspek ket mapapati a nakainom idi mapasamak ti insidente.
