VIGAN CITY – Kaso a panaglabsing ti Republic Act 10591 wenno illegal possession of firearms and ammunition act ken kaso nga alarm and scandal ti sangwen ti suspek a ni Juan Alcantara, agtawen ti lima pulo ket lima, mannalon ken agnaed idiay Brgy. Nambaran, Sto. Domingo gapu iti panagpaputok ken iligal a panagikot na iti paltog.
Segun ken ni Police Captain Christopher Ramat, hepe ti Sto. Domingo municipal police station, uppat a paltog pakairamanan ti maysa a caliber 22, maysa a caliber 38 ken dua a homemade shotgun ti naala manipud iti nabartek a suspek a nakemmeg iti likudan ti pagtaenganda.
Ti caliber 22 a naala manipud ti suspek ket isu iti inpaputok na iti mamindua a daras idi rabii.
Pinasingkedan ni Nambaran, Sto. Domingo barangay captain a nu mabartek ti suspek ket kanayon nga isu iti resrespondean dagiti barangay tanod ngem itay kallabes, awan iti ammo na a nakariri ti suspek nga isu kuma iti posible a nagprobokaran ken nagpaputukan na iti paltog.
No pay kasta, pinaglibakan met ti suspek a kukuana dagiti naala dagiti kameng ti linteg nga uppat a paltog kenkuana ket pinabasulna pay ti asawana nga isu ti nangiruar kadagiti nasao a paltog ta kunana a matmaturog iti kwartona idi dimteng dagiti pannakabagi ti linteg a nangkemmeg kenkuana.
