VIGAN CITY – Agsusukot a kaso kas ti damage to property, robbery ken violence and intimidation iti sanguen ni Randy Acosta nga agtawen ti uppat a pulo ket maysa, baro ken agnaed idiay Poblacion Este, Sta. Cruz a nagpaputok iti paltog idiay Barangay Gabor Norte, Sta. Cruz idi alas dos iti malem idi kalman, November 25.
Dayta ket gapu kadagiti nadadael ti suspek a sanikua pakairamanan ti windshield ti patrol car ti Sta. Cruz municipal police station ken gapu ti panangipaturongna ti paltog ken panangala na ti bag ti dua kadagiti agindeg idiay Barangay Gabor Norte.
Nadakamat ni Police Capt. Roger Baling-oay, hepe ti Sta. Cruz Police Station, a nagresponde da iti tawag manipud ti maysa a concern citizen inaig iti panagpaputok ti maysa a lalaki iti paltog idiay Barangay Gabor Norte ket idi napan da iti lugar, nadanunan da a nakaiggem ti dua a bato ti suspek ket idi kemmegen da kuman, binansag na iti patrol car ket nadadael ti windshield na.
Pinasingkedan ni Baling-oay nga awan iti sigud a rekord ti suspek iti kapulisan ngem imbestigaran da nu nangalaan na ti Colt MK IV caliber 45 pistol a naala da kenkuana.
