Nakemmeg ti maysa a lalaki a nagpangta nga agpabettak iti bomba idiay Barangay Ballaigui, Sinait, Ilocos Sur.
Nabigbig ti suspek a ni Jose Idian Ayson, agtawen iti uppat a pulo ket pito, agnaed iti nasao a lugar.
Dagiti biktima ket da Janielle Dinong Sarte ken ni Christina Raniaga Tangonan, agpada nga agtawen iti duapulo ket tallo, helper iti Allyson Cafe, ken taga-Barangay Sapriana.
Nagreport ni Mary Jane Oasay Dimsacat, agtawen iti tallopulo ket pito, ken ti kabsatna a ni Patrick Yadao Oasay, agtawen iti tallopulo ket maysa, owner ti Allyson Cafe, agpada a taga-Barangay Paratong, Sinait kadua dagiti biktima iti Sinait Police Station.
Iti alas nuebe kwarenta y singko iti bigat, napan ti suspek iti coffee shop da ken kinamatna dagiti dua a biktima sa na impangta a bombaenna ida.
Idi maawat dagiti pannakabagi ti linteg ti report, dagus a nangisayangkat ti Sinait Police Station iti hot pursuit operation ket nakemmeg ti suspek ken sangwenna ti kaso a Grave threat.
